உங்கள் எழுத்துமுறையைத் தாய்மொழியில் பயன்படுத்தும் வல்லுநர்களால் மதிப்பிடப்படும், இலத்தீனுக்கு அப்பாற்பட்ட தகவல் தொடர்பு வடிவமைப்பிற்கான உலகின் முதல் சர்வதேச விருது
அன்புடையீர்!
இலத்தீனுக்கு அப்பாற்பட்ட தகவல் தொடர்பு வடிவமைப்பிற்கான உலகின் முதல் போட்டியான GRANSHAN Bloom Award – முதல் பதிப்பு 2026 இல் படைப்புகளை அனுப்ப நீங்கள் ஆர்வம் காட்டுவதில் நாங்கள் பெருமகிழ்ச்சி அடைகிறோம்.
படைப்பை அனுப்புவதற்குத் தேவையான அனைத்துத் தகவல்களையும் கீழே விரிவாகத் தொகுத்துள்ளோம். போட்டிக்குப் படைப்பை எவ்வாறு அனுப்புவது, மதிப்பீடு எவ்வாறு நடைபெறுகிறது என்பதை இந்த வழிகாட்டுதல்கள் தெளிவாகவும் எளிதாகவும் விளக்குகின்றன. உங்கள் படைப்பை மிகச் சிறப்பாக முன்வைக்கத் தேவையான வழிகாட்டுதலையும் பார்வைகளையும் வழங்குவதே எங்கள் நோக்கம் – உங்கள் படைப்பாற்றல் முழுமையாக மலரட்டும்.
இந்தத் தகவல்கள் அனைத்தும் பதிவிறக்கப் பகுதியில் உள்ள PDF கோப்பிலும் கிடைக்கும்.
அனுப்ப வேண்டிய கூறுகளுக்கான விரிவான வழிமுறைகளைப் பின்பற்றுமாறு அன்புடன் கேட்டுக்கொள்கிறோம் – அவை இங்கே விரிவாக விளக்கப்பட்டுள்ளன! எங்களின் அடிக்கடி கேட்கப்படும் கேள்விகள் பகுதியையும் பாருங்கள்.
உங்கள் படைப்புகளை ஆவலுடன் எதிர்பார்க்கிறோம்!
GRANSHAN குழு
யார் பங்கேற்கலாம்?
GRANSHAN Bloom Award அழைப்பது:
வடிவமைப்பாளர்கள், எழுத்தமைப்பாளர்கள், படைப்பாக்க இயக்குநர்கள்
வடிவமைப்பகங்கள், முகமைகள், நிறுவன வடிவமைப்புக் குழுக்கள்
பதிப்பாளர்கள், பண்பாட்டு அமைப்புகள், அரசு சாரா அமைப்புகள்
மாணவர்கள், அண்மையில் பட்டம் பெற்றவர்கள்
இலத்தீனுக்கு அப்பாற்பட்ட சூழல்களில் செயல்படும் வணிக அடையாளங்கள் மற்றும் அமைப்புகள்
பண்பாடுகளை இணைக்கவும், கதைகளைச் சொல்லவும், அடையாளத்தை உருவாக்கவும் உங்கள் படைப்பில் எழுத்தமைப்பைப் பயன்படுத்துகிறீர்கள் என்றால் – இந்தப் போட்டி உங்களுக்கானது.
தகுதிக்குரிய காலவரம்பு
ஜனவரி 2023 முதல் டிசம்பர் 2026 வரை உருவாக்கப்பட்ட அல்லது முதன்முதலில் வெளியிடப்பட்ட படைப்புகளை அனுப்பலாம். வெளியீட்டுத் தேதி அல்லது நிறைவுத் தேதி இந்தக் காலவரம்பிற்குள் இருக்க வேண்டும். ஜனவரி 2023 க்கு முன் உருவாக்கப்பட்ட படைப்புகள் இன்னும் பயன்பாட்டிலோ விநியோகத்திலோ இருந்தாலும் தகுதி பெறாது.
எழுத்துமுறைக் குழுக்களும் ஊடகப் பிரிவுகளும்
GRANSHAN Bloom Award பல்வேறு பண்பாடுகள், எழுத்துமுறைகள், வடிவமைப்புத் துறைகளில் எழுத்தமைப்பின் சிறப்பைக் கொண்டாடுகிறது. அதன் மையத்தில் பண்பாட்டு ஆழத்தையும் தொழில்முறை நுட்பத்திறனையும் இணைக்கும் தனித்துவமான நடுவர் அமைப்பு உள்ளது: அனுப்பப்படும் ஒவ்வொரு படைப்பையும், அதில் பயன்படுத்தப்படும் எழுத்துமுறையையும் அது இடம்பெறும் ஊடகத்தையும் புரிந்த வல்லுநர்கள் மதிப்பிடுகின்றனர்.
எழுத்துமுறைக் குழுக்கள்
அரபு, சீனம் முதல் கிரேக்கம், ஜப்பானியம், கொரியம் மற்றும் அதற்கு அப்பாலும் உள்ள உலக எழுத்துமுறைகளின் பண்பாட்டு வளத்தையும் எழுத்தமைப்பு வளத்தையும் எங்கள் எழுத்துமுறைக் குழுக்கள் பிரதிபலிக்கின்றன. ஒவ்வொரு எழுத்துமுறைக் குழுவையும், அந்த எழுத்துமுறையைத் தாய்மொழியில் அல்லது அதன் மூலச் சூழலில் பயன்படுத்தும் 12 – 15 வல்லுநர்கள் பிரதிநிதித்துவப்படுத்துகின்றனர். உங்கள் படைப்பின் மொழி மற்றும் பண்பாட்டுச் சூழலை அவர்கள் ஆழமாகப் புரிந்துள்ளனர். பதிப்பாசிரிய வடிவமைப்பு முதல் அசையும் வரைகலை, இடச்சூழல் வடிவமைப்பு உள்ளிட்ட ஊடகப் பிரிவுகளுக்கான ஊடக வல்லுநர்கள் ஒவ்வொரு எழுத்துமுறைக் குழுவிலும் உள்ளனர்.
சில ஊடகப் பிரிவுகளை ஒரே வல்லுநர்கள் இணைந்து மதிப்பிடுகின்றனர் – எடுத்துக்காட்டாக, புத்தக வடிவமைப்பு வல்லுநர் சுவரொட்டிப் படைப்புகளையும் மதிப்பிடலாம். இதனால் உங்கள் படைப்புக்குக் குறிப்பிட்ட துறைசார் அறிவும், எழுத்தமைப்புச் சிறப்பைப் பற்றிய ஒருங்கிணைந்த பார்வையும் கிடைக்கின்றன.
2026 பதிப்பில், GRANSHAN Bloom Award பின்வரும் 8 எழுத்துமுறைக் குழுக்களில் கவனம் செலுத்துகிறது:
அரபு வழி எழுத்துமுறைகள் (அரபு, பாரசீகம், குர்து, உருது)
ஆர்மீனிய
சீன (மரபுச் சீனம் அல்லது எளிமைப்படுத்தப்பட்ட சீனம்)
கிரேக்க
தெற்காசிய எழுத்துமுறைகள் (குர்முகி, தேவநாகரி, குஜராத்தி, வங்காளம், தெலுங்கு, கன்னடம், மலையாளம், தமிழ், சிங்களம்)
ஜப்பானிய
கொரிய
தென்கிழக்காசிய எழுத்துமுறைகள் (தாய், பர்மியம், லாவோ, கெமர்)
வருங்காலப் பதிப்புகளில், சிரிலிக், ஜார்ஜிய, எபிரேய மற்றும் ஆப்பிரிக்கா முழுவதிலுமுள்ள எழுத்துமுறைகள் உள்ளிட்ட பிற எழுத்துமுறைகளையும் உள்ளடக்கும் வகையில் இந்த எழுத்துமுறைக் குழுக்கள் விரிவுபடுத்தப்படும்.
ஊடகப் பிரிவுகள்
இந்த எழுத்தமைப்புப் பன்மைத்துவத்துடன், போட்டியில் 9 ஊடகப் பிரிவுகளும் இடம்பெறுகின்றன – ஒவ்வொன்றும் சிறந்த எழுத்தமைப்புப் படைப்பாற்றலுக்குத் தனி மேடையை வழங்குகிறது. ஒவ்வொரு படைப்பும் அது அனுப்பப்படும் ஊடகப் பிரிவில், அந்தத் துறையின் வல்லுநர்களால் மதிப்பிடப்படுகிறது.
ஒரே படைப்பைப் பல ஊடகப் பிரிவுகளில் அனுப்பலாம். ஆனால் ஒவ்வொரு பிரிவிலும் தனித்தனியாகப் பதிவு செய்து கட்டணம் செலுத்த வேண்டும் (27 அக்டோபர் 2026 க்கு முன் படைப்புகளை அனுப்பியவர்களுக்கு வழங்கப்படும், ஒரு கூடுதல் படைப்பைக் கட்டணமின்றி அனுப்பும் வாய்ப்பு மட்டுமே இதற்கு விதிவிலக்கு). ஒவ்வொரு படைப்பையும் மாணவர் படைப்பாகவோ தொழிற்பயிற்சிப் படைப்பாகவோ விருப்பத்தின்படி குறிக்கலாம்.
1 – பதிப்பாசிரிய வடிவமைப்பு மற்றும் வெளியீடு
அச்சு மற்றும் மின்னூடகங்களில் உள்ளடக்கமும் எழுத்தமைப்பும் இணைந்து, வாசிப்பில் ஆழ்த்தும் அனுபவங்களை உருவாக்கும் சிறந்த பதிப்பாசிரிய வடிவமைப்புப் படைப்புகள்.
தகுதியான வடிவங்கள்:
நூல் வடிவமைப்பு (எ.கா. புனைவு, புனைவல்லாத நூல்கள், கலை நூல்கள், பட்டியல் நூல்கள்)
இதழ் மற்றும் செய்தித்தாள் வடிவமைப்பு (அச்சு அல்லது மின்னூடகம்)
எழுத்தமைப்பு சார்ந்த பதிப்புத் தொடர்கள் (பத்திகள், இலக்கியத் தொடர்கள், தொடர் கட்டுரைகள்)
சுயாதீன வெளியீடுகள் (சிற்றிதழ்கள், சுய வெளியீட்டு நூல்கள், செய்திமடல்கள், சோதனை வடிவங்கள்)
2 – சுவரொட்டிகள் (அச்சு மற்றும் மின்னூடகம்)
பண்பாட்டு, வணிக அல்லது சமூகச் சூழல்களில், வலுவான செய்தி, எழுத்தமைப்புத் தெளிவு, காட்சித் தாக்கம் ஆகியவற்றை வலியுறுத்தும் சிறந்த சுவரொட்டி வடிவமைப்பு.
தகுதியான வடிவங்கள்:
தனிச் சுவரொட்டிகள்
சுவரொட்டித் தொடர்கள்
பெரிய அளவுச் சுவரொட்டிகள் (எ.கா. 18/1 விளம்பரப் பலகைகள், நகர்ப்புற வெளிப்புற வடிவங்கள்)
மின்னூடகச் சுவரொட்டிகள் (பொது அல்லது வணிக இடங்களில் திரைவழிக் காட்சிகள்)
3 – பொதிவாக்க வடிவமைப்பு
வணிக அடையாளத்தையும் பயனர் ஈடுபாட்டையும் மேம்படுத்தும் புதுமையான, பயனுள்ள பொதிவாக்கம். எழுத்தமைப்பின் நுட்பங்களுக்கும் வடிவத்தின் வழியே காட்சியாகக் கதை சொல்வதற்கும் சிறப்பு கவனம்.
தகுதியான வடிவங்கள்:
தனிப் பொருளுக்கான பொதிவாக்கம்
பொருள் வகைகளும் தொடர்களும்
எழுத்தமைப்பு சார்ந்த பொதிவாக்கம் (எழுத்துவடிவத்தை முதன்மைக் காட்சிக் கூறாகக் கொண்ட வடிவமைப்புகள்)
4 – மின்னூடகம் மற்றும் இடைமுக வடிவமைப்பு
மின்வெளியில் ஊடாட்டத்தையும் எழுத்தமைப்பின் சிறப்பையும் அடுத்த நிலைக்குக் கொண்டுசெல்லும் படைப்பாற்றல் மிக்க திரைசார் வடிவமைப்புத் தீர்வுகள்.
தகுதியான வடிவங்கள்:
இணையதளங்களும் பயனர் இடைமுகங்களும்
கைப்பேசிச் செயலிகள்
மின் வெளியீடுகள் / மின்னூல்கள் / ஊடாடும் நூல்கள்
குறுந்தளங்கள் அல்லது மின்னூடகக் கதைசொல்லல் தளங்கள்
5 – அசையும் வரைகலை மற்றும் அசைவூட்டம்
கதைகளைச் சொல்லவும் கருத்துகளை வெளிப்படுத்தவும் கவனத்தை வழிநடத்தவும் எழுத்தமைப்பையும் காட்சி அசைவையும் பயன்படுத்தும் காலம் சார்ந்த வடிவமைப்புப் படைப்புகள்.
தகுதியான வடிவங்கள்:
எழுத்தமைப்பு அசைவூட்டங்கள்
தலைப்புக் காட்சித் தொடர்கள்
பரப்புரைகள், இசை, கல்வி அல்லது வணிக அடையாள உருவாக்கத்திற்கான அசையும் வரைகலை
அசையும் எழுத்துவடிவச் சோதனை முயற்சிகள்
மாறும் எழுத்துருக் கோப்புகளைத் தனித்துவமாகப் பயன்படுத்தும் படைப்புகள் (எ.கா. மாறக்கூடிய எழுத்துத் தடிமன், அகலம் அல்லது காட்சியளவு)
6 – இடச்சூழல் மற்றும் அனுபவ வடிவமைப்பு
நேரடி அல்லது நேரடி-மின்னூடகம் இணைந்த சூழலில் அனுபவங்களை வடிவமைக்க எழுத்துவடிவம், படங்கள், கட்டமைப்பு ஆகியவற்றைப் பயன்படுத்தும் இடம்சார் தகவல் தொடர்புப் படைப்புகள்.
தகுதியான வடிவங்கள்:
கண்காட்சி மற்றும் வர்த்தகக் காட்சி வடிவமைப்பு
வழிகாட்டும் அமைப்புகளும் குறியீட்டுப் பலகைகளும்
இடம்சார் எழுத்தமைப்பு (நிறுவல் கலை, கட்டடக்கலையில் எழுத்துவடிவம், மின்னூடகமும் நேரடிச் சூழலும் இணைந்த வடிவங்கள்)
7 – பரப்புரைகள்
வலுவான எழுத்தமைப்பு மற்றும் காட்சிக் கதைசொல்லலுடன், ஒன்று அல்லது பல வழிகளில் மேற்கொள்ளப்படும் ஒருங்கிணைந்த தகவல் தொடர்பு உத்திகள்.
தகுதியான வடிவங்கள்:
அச்சுப் பரப்புரைகள் (பதிப்பாசிரியப் பணி, விளம்பரம், பொதுமக்களுடனான தகவல் தொடர்பு)
பல ஊடகப் பரப்புரைகள் (அச்சு, மின்னூடகம், நேரடிச் சூழல்)
பொதுநலத் தகவல் தொடர்பு (சமூகம், அரசியல், பண்பாடு)
8 – காட்சி அடையாளம் மற்றும் வணிக அடையாள உருவாக்கம்
எழுத்தமைப்பும் காட்சி மொழியும் வழியே தன்மை, மதிப்புகள், சூழல் ஆகியவற்றை வெளிப்படுத்தும் சீரான வணிக அடையாளங்களின் வடிவமைப்பு.
தகுதியான வடிவங்கள்:
நிறுவன வடிவமைப்பு அமைப்புகள் / காட்சி அடையாளங்கள்
இலச்சினை வடிவமைப்பு
எழுத்துவடிவத்தை மையமாகக் கொண்ட வணிக அடையாள உருவாக்கம் (எழுத்துவடிவத்தை முதன்மையாகக் கொண்ட அடையாளங்கள்)
9 – சோதனை முயற்சிகள், வெளியிடப்படாத மற்றும் எழுத்தோவியப் படைப்புகள்
குறிப்பாக இலத்தீனுக்கு அப்பாற்பட்ட எழுத்துமுறைச் சூழல்களில், புதிய எழுத்தமைப்பு அணுகுமுறைகள், கருவிகள், பண்பாட்டுக் கதையாடல்கள் ஆகியவற்றை ஆராயும் சுயாதீன மற்றும் சாத்தியங்களைச் சிந்திக்கும் படைப்புகளுக்கான இடம். தகுதியான வடிவங்கள்:
சுயமுயற்சிப் படைப்புகள்
ஆராய்ச்சி சார்ந்த அல்லது கருத்தாக்க அடிப்படையிலான முன்வடிவங்கள்
தொடக்கநிலைக் கருத்தாக்கங்கள் / உருவாக்கத்தில் உள்ள படைப்புகள்
எழுத்தோவியப் படைப்புகளும் தேடல்களும்
இன்னும் வெளியிடப்படாத அல்லது செயலாக்கப்படாத படைப்புகள்
எழுத்தமைப்பில் புதிய தேடல்கள்
மதிப்பீட்டு அளவுகோல்கள்
GRANSHAN Bloom Award க்கு அனுப்பப்படும் ஒவ்வொரு படைப்பையும் துணிச்சலான சிந்தனைகளையும் குறையற்ற செயலாக்கத்தையும் மதிக்கும் வல்லுநர்கள் அக்கறையுடனும் ஆர்வத்துடனும் மதிப்பிடுகிறார்கள். எங்கள் அளவுகோல்கள் கருத்தாக்கம், கைத்திறன், பண்பாட்டுப் பொருத்தம் ஆகியவற்றுக்கிடையிலான சமநிலையைப் பிரதிபலிக்கின்றன. சிறந்த படைப்பு அதன் அனைத்துப் பரிமாணங்களிலும் அங்கீகரிக்கப்படுவதை இது உறுதிசெய்கிறது.
கருத்தாக்கமும் புதுமையும் – வியப்பூட்டும், ஊக்கமளிக்கும், துறையை முன்னோக்கி நகர்த்தும் கருத்துகள்.
தகவல் தொடர்பும் தெளிவும் – துல்லியத்துடனும் நோக்கத்துடனும் பேசும் வடிவமைப்பு.
காட்சித் தரமும் அழகியல் தரமும் – அழகு, சமநிலை, நுண்விவரம் ஆகியவை முழுமையாக ஒன்றிணைதல்.
எழுத்தமைப்புச் சிறப்பு – எழுத்துவடிவங்களிலும் அவை சார்ந்த எழுத்துமுறைகளிலும் தேர்ச்சி.
கைத்திறனும் செயலாக்கமும் – ஒவ்வொரு கூறும் நோக்கத்துடன் அமைக்கப்பட்ட குறையற்ற நிறைவு.
பயன்பாட்டு எளிமையும் செயல்திறனும் – வடிவத்திலும் செயல்பாட்டிலும் தடையின்றி இயங்குதல்.
பண்பாட்டு மற்றும் சமூகப் பொருத்தம் – தன் காலம், இடம், பார்வையாளர்களுடன் ஒத்திசையும் வடிவமைப்பு.
அனைத்து அளவுகோல்களும் முக்கியமானவை. அவற்றில் மூன்று எங்கள் நோக்கத்தின் மையமாக உள்ளன. நடுவர் மதிப்பீட்டில் அவை ஒவ்வொன்றுக்கும் இருமடங்கு முக்கியத்துவம் வழங்கப்படும்: கருத்தாக்கமும் புதுமையும், எழுத்தமைப்புச் சிறப்பு, பண்பாட்டு மற்றும் சமூகப் பொருத்தம். இம்மூன்றும் GRANSHAN Bloom Award இன் உயிரோட்டமான மூன்று தூண்கள்: துணிச்சலான சிந்தனையின் பொறி; ஒவ்வொரு வளைவிலும் எழுத்தின் உட்புற வெளிகளிலும் வெளிப்படும் எழுத்துமுறைத் தேர்ச்சி; பண்பாட்டு மண்ணில் வேரூன்றிய வடிவமைப்பின் ஆழமான ஒத்திசைவு. இங்குதான் தொலைநோக்கும் கைத்திறனும் சந்திக்கின்றன. அவை பணியாற்றும் கதைகள், குறியீடுகள், சமூகங்கள் ஆகியவற்றில் இரண்டும் தங்கள் உண்மையான பொருளைக் கண்டடைகின்றன.
நடுவர் குழு
ஆழமான பண்பாட்டு வல்லமையையும் விரிவான தொழில்முறைப் பார்வையையும் இணைக்கும் வகையில் GRANSHAN Bloom Award நடுவர் குழு அமைக்கப்பட்டுள்ளது. இதனால் ஒவ்வொரு படைப்பும் அதன் முழுமையான எழுத்தமைப்பு, பண்பாடு, வடிவமைப்புச் சூழலில் புரிந்துகொள்ளப்படுகிறது.
எழுத்துமுறைத் தலைவர்கள்
ஒவ்வொரு எழுத்துமுறைக் குழுவையும் ஓர் எழுத்துமுறைத் தலைவர் வழிநடத்துகிறார் – அந்த எழுத்துமுறையில் சர்வதேச அங்கீகாரம் பெற்ற, பெரிதும் மதிக்கப்படும் ஒருவர். பல்வேறு ஊடகங்களில் பொதுவான பார்வையுடன் செயல்படும் அவர், ஒவ்வொரு படைப்பும் பண்பாட்டுத் துல்லியத்துடனும் எழுத்தமைப்புப் புரிதலுடனும் மதிப்பிடப்படுவதை உறுதிசெய்கிறார்.
ஊடக வல்லுநர்கள்
எழுத்துமுறைத் தலைவருடன், ஒவ்வொரு எழுத்துமுறைக் குழுவிலும் 3 – 5 ஊடக வல்லுநர்கள் உள்ளனர். அவர்களின் திறன்கள் எங்கள் ஒன்பது ஊடகப் பிரிவுகளின் முழுப் பரப்பையும் உள்ளடக்குகின்றன. தெளிவுக்காக, இந்தப் பிரிவுகள் நான்கு துறைசார் தொகுதிகளாகப் பிரிக்கப்பட்டுள்ளன:
பதிப்பாசிரிய வடிவமைப்பு மற்றும் வெளியீடு, சுவரொட்டிகள், பொதிவாக்க வடிவமைப்பு
மின்னூடகம் மற்றும் இடைமுக வடிவமைப்பு, அசையும் வரைகலை மற்றும் அசைவூட்டம்
இடச்சூழல் மற்றும் அனுபவ வடிவமைப்பு, சோதனை முயற்சிகள், வெளியிடப்படாத மற்றும் எழுத்தோவியப் படைப்புகள்
பரப்புரைகள், காட்சி அடையாளம் மற்றும் வணிக அடையாள உருவாக்கம்
ஒவ்வொரு எழுத்துமுறைக் குழுவின் நடுவர் குழுவிலும் அனைத்து துறைசார் தொகுதிகளுக்கும் பிரதிநிதித்துவம் உண்டு. இதனால் ஒரு படைப்பை அதன் எழுத்துமுறை வல்லுநர்களுடன், தொடர்புடைய ஊடகத்தில் நிபுணத்துவம் பெற்ற ஒருவரும் எப்போதும் மதிப்பிடுகிறார்.
எழுத்துமுறைத் தேர்ச்சி, ஊடக அறிவு ஆகிய இரண்டிலும் செலுத்தப்படும் இந்தக் கவனம், உங்கள் படைப்புக்குரிய துல்லியம், நியாயம், ஆழம் ஆகியவற்றுடன் அது மதிப்பிடப்படுவதை உறுதிசெய்கிறது.
50 Best of the Best Jury
இறுதிக் காலகட்டத்தில், Bloom Award வெற்றியாளர்கள் அனைவரின் படைப்புகளையும் 50 Best of the Best Jury பரிசீலித்து, அதிகபட்சமாக 50 Best of the Best ஐத் தேர்ந்தெடுக்கிறது. உலக வடிவமைப்பில் மிகவும் புகழ்பெற்ற சில ஆளுமைகளை இந்த நடுவர் குழு ஒன்றிணைக்கிறது – மேற்கத்திய மரபின் குரல்களுடன் இலத்தீனுக்கு அப்பாற்பட்ட உலகின் முன்னணி ஆளுமைகளும் இணைகின்றனர். இந்த இணைப்பு திட்டமிட்டதே: தகவல் தொடர்பு வடிவமைப்பின் முழுப் பரப்பையும் உள்ளடக்கும் அதே வேளையில், இலத்தீன் எழுத்துமுறைக்கு அப்பாற்பட்ட உலக எழுத்துமுறைகளில் வலுவான கவனம் செலுத்தி, அவற்றின் உலகளாவிய பண்பாட்டு முக்கியத்துவத்தை வலியுறுத்துவதே அதன் நோக்கம். பங்கேற்பதை ஏற்கெனவே உறுதிசெய்தவர்களில் Stefan Sagmeister ஒருவர்.
நடுவர் குழு உறுப்பினர்கள் படிப்படியாக அறிவிக்கப்படுவார்கள்; முதல் பெயர்கள் 2026 தொடக்கத்தில் வெளியிடப்படும்.
நடுவர் மதிப்பீட்டு நடைமுறையும் விருதுகளும்
GRANSHAN Bloom Award மூன்று கட்ட நடுவர் மதிப்பீட்டு நடைமுறையைப் பின்பற்றுகிறது. ஒவ்வொரு கட்டத்திலும் சிறப்பை அங்கீகரிக்கவும், வெற்றி பெறும் ஒவ்வொரு படைப்புக்கும் அர்த்தமுள்ள அங்கீகாரமும் கவனமும் கிடைப்பதை உறுதிசெய்யவும் இது வடிவமைக்கப்பட்டுள்ளது.
அனைத்துப் படைப்புகளும் அடையாளம் மறைக்கப்பட்ட வடிவில் நடுவர் குழுவுக்கு வழங்கப்படுகின்றன. ஒவ்வொரு படைப்புடனும் படைப்புப் படிவத்தில் உள்ள விளக்க உரைகள் (அடையாளம் வெளிப்படுத்தும் விவரங்கள் இன்றி), கிடைக்கும் இடங்களில் அசைவூட்டப்பட்ட அல்லது அசைவு சார்ந்த காட்சிப்படுத்தல்கள் ஆகியவை இடம்பெறும். இதனால் வடிவமைப்பின் காட்சித் தரத்தை மட்டுமல்லாமல், அது செயல்பட வேண்டிய அசைவுள்ள சூழலில் எவ்வாறு செயல்படுகிறது என்பதையும் நடுவர்களால் மதிப்பிட முடிகிறது.
நீங்கள் வெல்லக்கூடியவை
வெற்றிபெறும் ஒவ்வொரு படைப்புக்கும் Bloom Award வழங்கப்படுகிறது – இது GRANSHAN Bloom Award இன் தனிச்சிறப்பான அங்கீகாரம். அனைத்து விருதுகளும் சம மதிப்புடையவை; தங்கம், வெள்ளி, வெண்கலம் என்ற தரவரிசைகள் இல்லை.
இந்த வெற்றியாளர்களிலிருந்து 50 Best of the Best Jury அதிகபட்சமாக 50 Best of the Best ஐத் தேர்ந்தெடுக்கிறது – இதுவே போட்டியின் மிக உயர்ந்த அங்கீகாரம்.
மேலும், கூட்டாளர் நிறுவனங்கள் மற்றும் அமைப்புகளுடன் இணைந்து பல்வேறு சிறப்பு விருதுகளை வழங்கத் திட்டமிட்டுள்ளோம். எடுத்துக்காட்டாக, சோதனைக் கருவிகளையும் வளர்ந்துவரும் தொழில்நுட்பங்களையும் ஆராயும் படைப்புகள், எழுத்தமைப்புப் பண்பாடு மற்றும் மரபுடன் ஆழமாக ஈடுபடும் படைப்புகள், அல்லது சமூகத் தாக்கத்தை உருவாக்கும் வடிவமைப்பின் ஆற்றலை வெளிப்படுத்தும் படைப்புகள் இவற்றால் முன்னிலைப்படுத்தப்படலாம். கூட்டாண்மைகள் உறுதிசெய்யப்பட்டதும் குறிப்பிட்ட சிறப்பு விருதுகள் அறிவிக்கப்படும்.
ஆதரவு எழுத்துரு நிறுவனங்களின் தேர்வு விருது
முதன்மை நடுவர் விருதுகளுடன், எங்கள் ஆதரவு எழுத்துரு நிறுவனங்கள் ஒவ்வொன்றும் ஒரு சிறப்பு அங்கீகாரத்தை வழங்கலாம்: எழுத்துரு நிறுவனத்தின் தேர்வு. அதிகாரப்பூர்வ நடுவர் முடிவுகளுக்குப் பிறகு, தங்கள் எழுத்துருக்கள் குறிப்பிட்ட படைப்பாற்றலுடனும் தாக்கத்துடனும் பயன்படுத்தப்பட்டுள்ள விருதுபெற்ற படைப்புகளில் ஒன்றை ஒவ்வொரு எழுத்துரு நிறுவனமும் தேர்ந்தெடுக்கலாம்.
இந்தப் படைப்புகள் இருமுறை முன்னிலைப்படுத்தப்படும் – முதலில் எழுத்துரு நிறுவனத்தின் சொந்த ஊடகங்களிலும், மீண்டும் GRANSHAN இன் உலகளாவிய தளங்களிலும். இதன் மூலம் தேர்ந்தெடுக்கப்பட்ட படைப்புகளுக்குச் சர்வதேச வடிவமைப்புச் சமூகத்தில் கூடுதல் கவனம், நம்பகத்தன்மை, விளம்பர ஆதரவு கிடைக்கும்.
பங்கேற்பாளர்களுக்கு இது வெற்றிபெற இன்னொரு வாய்ப்பு: Bloom Award போட்டியின் Bloom Award விருதையும் தாண்டி, உலகளவில் செயல்படும் முன்னணி எழுத்துரு நிறுவனம் உங்கள் படைப்பைத் தனது சிறப்புத் தேர்வாகத் தேர்ந்தெடுக்கலாம். இதன் மூலம் இன்று செல்வாக்கு மிக்க சில சுயாதீன எழுத்துருக் கோப்பு வெளியீட்டாளர்களுடன் உங்கள் படைப்பு நேரடியாக இணைகிறது.
நடுவர் மதிப்பீட்டு நடைமுறையின் மூன்று காலகட்டங்கள்
காலகட்டம் 1 – துறைசார் நடுவர் குழு மதிப்பீடு
முதல் மதிப்பீட்டில், குறிப்பிட்ட ஊடகப் பிரிவுகள் மற்றும் எழுத்துமுறைக் குழுக்களில் வல்லுநர்களான 100 க்கும் மேற்பட்ட நடுவர்கள் அனைத்துப் படைப்புகளையும் பரிசீலிக்கின்றனர். ஒவ்வொரு நடுவரும் தனித்தனியாக 1 (குறைவு) முதல் 5 (உயர்வு) வரை மதிப்பெண் அளிக்கிறார். 3.0 க்குக் கீழ் மதிப்பெண் பெறும் படைப்புகள் அடுத்த காலகட்டத்திற்குச் செல்லாது; ஒரு நடுவர் வலுவான காரணத்துடன் அவற்றை மீண்டும் பரிந்துரைத்தால் மட்டுமே செல்லலாம்.
காலகட்டம் 2 – Bloom Award முடிவுகள்
சராசரியாக 3.0 அல்லது அதற்கு மேல் மதிப்பெண் பெறும் அனைத்துப் படைப்புகளும் அடுத்த காலகட்டத்திற்குச் செல்கின்றன. துறைசார் நடுவர் குழுக்கள் இணையக் கூட்டங்களில் சந்தித்து இந்தப் படைப்புகளை ஆழமாக விவாதிக்கின்றன. கலந்தாய்வுக்குப் பிறகு, Bloom Award வழங்குவதற்கு “ஆம்” அல்லது “இல்லை” என்று நடுவர்கள் வாக்களிக்கின்றனர்:
3 நடுவர்கள்: குறைந்தது 2 “ஆம்” வாக்குகள் தேவை
4 நடுவர்கள்: குறைந்தது 3 “ஆம்” வாக்குகள் தேவை
5 நடுவர்கள்: குறைந்தது 4 “ஆம்” வாக்குகள் தேவை
Bloom Award பெறும் ஒவ்வொரு படைப்புக்கும் சான்றிதழ் வழங்கப்படுகிறது – அந்த ஆண்டின் வெற்றிப் படைப்புகளில் ஒன்றாக அதை அங்கீகரிக்கிறது.
காலகட்டம் 3 – Best of the Best
அனைத்து Bloom Award வெற்றியாளர்களிலிருந்தும் 50 Best of the Best Jury அதிகபட்சமாக 50 Best of the Best ஐத் தேர்ந்தெடுக்கிறது – இதுவே போட்டியின் மிக உயர்ந்த அங்கீகாரம். இந்தச் சிறப்புமிக்க நடுவர் குழுவில் உலக வடிவமைப்பின் மிகவும் புகழ்பெற்ற சில ஆளுமைகள் உள்ளனர்.
“Best of the Best” எனத் தேர்ந்தெடுக்கப்படுவது, உங்கள் துறையின் வல்லுநர்களை மட்டுமின்றி நம் காலத்தின் தொலைநோக்குப் பார்வை மிக்க சில வடிவமைப்பாளர்களையும் உங்கள் படைப்பு கவர்ந்துள்ளது என்பதைக் குறிக்கிறது.
வெற்றியாளர்களுக்குக் கிடைப்பவை
GRANSHAN Bloom Award வெல்வது ஓர் அங்கீகாரத்தைப் பெறுவதைக் காட்டிலும் மேலானது. எழுத்தமைப்பும் வடிவமைப்பும் குறித்த உலகளாவிய உரையாடலின் ஒரு பகுதியாக உங்கள் படைப்பு மாறுகிறது – பார்க்கப்படுகிறது, கொண்டாடப்படுகிறது, நினைவில் நிற்கிறது. ஒவ்வொரு அங்கீகாரமும் உங்கள் படைப்புக்குக் கவனம், சூழல், நீடித்த இருப்பு ஆகியவற்றை வழங்கும் வகையில் வடிவமைக்கப்பட்டுள்ளது.
Bloom Award
விருதுபெறும் ஒவ்வொரு படைப்புக்கும் GRANSHAN Bloom Award வழங்கப்படுகிறது – வெற்றியாளர்கள் தங்கள் வெற்றியை வெளிப்படுத்தப் பயன்படுத்தக்கூடிய சாதனையின் அடையாளம். சான்றிதழுடன், தங்கள் அங்கீகாரத்தைப் பகிர உதவும் அதிகாரப்பூர்வப் பொருட்களும் வெற்றியாளர்களுக்கு வழங்கப்படுகின்றன – எடுத்துக்காட்டாக, சமூக ஊடகங்கள், படைப்புத் தொகுப்புகள் அல்லது பத்திரிகைத் தகவல் தொடர்புகளில் பயன்படுத்துவதற்கு.
உலகளாவிய அங்கீகாரம்
வெற்றிபெறும் படைப்புகள் GRANSHAN இன் ஊடகங்களிலும் எங்கள் ஊடகக் கூட்டாளர்களின் ஊடகங்களிலும் முன்னிலைப்படுத்தப்பட்டு, சர்வதேச வடிவமைப்புச் சமூகத்தையும் அதற்கு அப்பாலும் சென்றடைகின்றன. தொழில்முறை வலையமைப்புகளில், உலகெங்குமுள்ள வடிவமைப்பாளர்கள், வாடிக்கையாளர்கள், கல்வியாளர்கள், பண்பாட்டு அமைப்புகளிடையே உங்கள் படைப்பு கவனம் பெறுகிறது.
இணையக் கண்காட்சி மற்றும் காப்பகம்
வெற்றிபெறும் அனைத்துப் படைப்புகளும் granshan.com இல் தேர்ந்தெடுத்துத் தொகுக்கப்பட்ட இணையக் காட்சியில் இடம்பெறும். முதல் காட்சிப்படுத்தலுக்குப் பிறகு, ஒவ்வொரு படைப்பும் GRANSHAN இன் நிரந்தர இணையக் காப்பகத்தின் பகுதியாகிறது – மேற்கோள், ஆய்வு, ஊக்கம் ஆகியவற்றுக்காகப் பொதுமக்கள் அணுகக்கூடிய நீடித்த பதிவாக விளங்குகிறது.
அச்சில் அங்கீகாரம்
ஒவ்வொரு வெற்றியாளரும் GRANSHAN இன் அதிகாரப்பூர்வ அச்சுப் பொருட்களில் இடம்பெறுவார். Best of the Best வெற்றியாளர்களுக்கு இவை நேரடியாக அனுப்பப்படும்; மற்ற வெற்றியாளர்கள் அனுப்புகைச் செலவை ஏற்று வேண்டுகோளின் பேரில் பெறலாம், அல்லது GRANSHAN கண்காட்சிகளிலும் மாநாடுகளிலும் பெற்றுக்கொள்ளலாம். பட்டியலேடு என்பதைத் தாண்டி, இந்த அச்சுப் பொருட்கள் எழுத்தமைப்புச் சிறப்பின் தொட்டுணரக்கூடிய ஆவணமாகும்.
விருதுகளின் முதல் அறிமுகம் மற்றும் முதன்மைக் கண்காட்சி
எழுத்தமைப்பு, பண்பாடு, வடிவமைப்பு ஆகியவற்றுக்கான மாநாட்டின் ஒரு பகுதியாக நடைபெறும் GRANSHAN Bloom Award விழாவில் Best of the Best அறிவிக்கப்படுகின்றன. நிகழ்வுடன் நடைபெறும் தேர்ந்தெடுத்துத் தொகுக்கப்பட்ட கண்காட்சி, தேர்வான ஒவ்வொரு படைப்பின் முழுத் தாக்கத்தையும் பார்வையாளர்கள் அனுபவிக்க உதவுகிறது.
பிராந்திய மற்றும் கூட்டாளர் கண்காட்சிகள்
விருதுகளின் முதல் அறிமுகம் மற்றும் முதன்மைக் கண்காட்சிக்குப் பிறகு, தேர்ந்தெடுக்கப்பட்ட படைப்புகள் GRANSHAN இன் சர்வதேசக் கூட்டாளர் வலையமைப்பின் மூலம் காட்சிப்படுத்தப்படும். உலகின் பல பகுதிகளில் ஒரே நேரத்தில் நடைபெறக்கூடிய பிராந்தியக் கண்காட்சிகளும் இதில் அடங்கும்.
கண்காட்சிகளிலும் வெளியீடுகளிலும் இடம்பெற உதவும் வகையில், பங்கேற்பாளர்கள் அனைவரும் படைப்பை அனுப்பும்போதே அச்சிடத் தயாரான குறைந்தது ஒரு படத்தை அல்லது மறுபிரதியை வழங்க வேண்டும்.
பிரிவுகளும் கட்டணங்களும்
GRANSHAN Bloom Award சமூகத்தால், சமூகத்திற்காக உருவாக்கப்பட்டது.
அனைத்து அளவுகளிலும் அனைத்துப் பொருளாதாரச் சூழல்களிலும் உள்ள வடிவமைப்பாளர்களும் நிறுவனங்களும் பங்கேற்க வழிசெய்வதே எங்கள் நோக்கம். அதே வேளையில் போட்டியை நடத்தவும், நடுவர் மதிப்பீட்டு நடைமுறையைச் செயல்படுத்தவும், வெற்றியாளர்களை உரிய முறையில் கௌரவிக்கவும் எங்களால் இயல வேண்டும்.
செயல்முறை நியாயமாக இருக்க, சுய மதிப்பீட்டின் அடிப்படையில் மூன்று கட்டண நிலைகளை வழங்குகிறோம்:
குறைந்த வருமானத்தினர் / மாணவர்கள் / தொழிற்பயிற்சியாளர்கள் / தனிப்பணியாளர்கள் – குறைந்த வளங்களைக் கொண்ட தனிநபர்கள், மாணவர்கள், சுயாதீன வடிவமைப்பாளர்களுக்கு.
சிறு மற்றும் நடுத்தர நிறுவனங்கள் – குறைந்த குழு அளவும் வருவாயும் கொண்ட வடிவமைப்பகங்கள் மற்றும் முகமைகளுக்கு.
பெரிய நிறுவனங்கள் – அதிக நிறுவனத் திறன் கொண்ட, நிலைபெற்ற முகமைகள், நிறுவனங்கள் அல்லது அமைப்புகளுக்கு.
ஒவ்வொரு பங்கேற்பாளரும் தங்கள் நிலைமையைச் சரியாகப் பிரதிபலிக்கும் பிரிவைத் தேர்ந்தெடுப்பார் என்று நம்புகிறோம். படைப்புகள் ஏற்பு முடியும் வரை கட்டணங்கள் மாறாது – காலகட்டங்களோ விலை உயர்வுகளோ இல்லை. பரப்புரைகள் மற்றும் காட்சி அடையாளம் மற்றும் வணிக அடையாள உருவாக்கம் ஆகியவற்றுக்கான கட்டணம் மற்ற பிரிவுகளின் கட்டணத்தைவிட இருமடங்கு. பங்கேற்புக் கட்டணம் மட்டுமே கட்டாயச் செலவு: வெற்றியாளர் கட்டணங்களோ மறைமுகக் கட்டணங்களோ இல்லை.
ஒவ்வொரு படைப்புக்கும் ஒவ்வொரு ஊடகப் பிரிவுக்கும் கட்டணம் பொருந்தும். ஒரே படைப்பைப் பல பிரிவுகளில் அனுப்பினால், ஒவ்வொரு பதிவும் தனித்தனியாக மதிப்பிடப்படும்; தனித்தனியாகக் கட்டணமும் செலுத்த வேண்டும். 27 அக்டோபர் 2026 க்கு முன் அனுப்பிய படைப்புகளுக்காக வழங்கப்படும் கூடுதலான ஓர் இலவசப் படைப்பு மட்டுமே விதிவிலக்கு.
ஏற்கெனவே படைப்பை அனுப்பிவிட்டீர்களா? உங்கள் படைப்பு அப்படியே இருக்கும். 27 அக்டோபர் 2026 க்கு முன் அனுப்பப்பட்ட படைப்புகளை 22 டிசம்பர் 2026 வரை கட்டணமின்றித் திருத்தலாம் அல்லது நிறைவுசெய்யலாம். இப்போது கட்டணங்கள் குறைந்துள்ளதால், ஒரு கூடுதல் படைப்பையும் கட்டணமின்றி அனுப்பலாம்; உங்களைத் தனிப்பட்ட முறையில் தொடர்புகொள்வோம்.
| பிரிவு | குறைந்த வருமானத்தினர் / மாணவர்கள் / தனிப்பணியாளர்கள் | சிறு மற்றும் நடுத்தர நிறுவனங்கள் | பெரிய நிறுவனங்கள் |
|---|---|---|---|
| 1. பதிப்பாசிரிய வடிவமைப்பு மற்றும் வெளியீடு | 15 € | 45 € | 125 € |
| 2. சுவரொட்டிகள் (அச்சு மற்றும் மின்னூடகம்) | 15 € | 45 € | 125 € |
| 3. பொதிவாக்க வடிவமைப்பு | 15 € | 45 € | 125 € |
| 4. மின்னூடகம் மற்றும் இடைமுக வடிவமைப்பு | 15 € | 45 € | 125 € |
| 5. அசையும் வரைகலை மற்றும் அசைவூட்டம் | 15 € | 45 € | 125 € |
| 6. இடச்சூழல் மற்றும் அனுபவ வடிவமைப்பு | 15 € | 45 € | 125 € |
| 7. பரப்புரைகள் | 30 € | 90 € | 250 € |
| 8. காட்சி அடையாளம் மற்றும் வணிக அடையாள உருவாக்கம் | 30 € | 90 € | 250 € |
| 9. சோதனை முயற்சிகள், வெளியிடப்படாத மற்றும் எழுத்தோவியப் படைப்புகள் | 15 € | 45 € | 125 € |
படைப்புகளை அனுப்பும் காலவரிசை மற்றும் நடுவர் மதிப்பீட்டு நடைமுறை
GRANSHAN Bloom Award தெளிவான காலகட்டங்களில் நடைபெறுகிறது. உங்கள் சிறந்த படைப்பைத் தயாரிக்கப் போதிய நேரத்தை வழங்குவதோடு, நியாயமான, முழுமையான மதிப்பீட்டையும் இது உறுதிசெய்கிறது.
படைப்புகளை அனுப்பும் காலகட்டம்
படைப்புகள் ஏற்பு தொடக்கம்: டிசம்பர் 2025
27 அக்டோபர் 2026 முதல் அனைவருக்கும் குறைந்த பங்கேற்புக் கட்டணங்கள்; படைப்புகள் ஏற்பு முடியும் வரை மாறாது – காலகட்டங்களோ விலை உயர்வுகளோ இல்லை
படைப்புகள் ஏற்பு முடிவு: 22 டிசம்பர் 2026 – இதுவே இறுதி நாள்; மேலும் நீட்டிப்பு இல்லை
படைப்புகளை அனுப்பிய பிறகு
நிர்வாகம்: டிசம்பர் 2026 – அனைத்துப் படைப்புகளும் நடுவர் மதிப்பீட்டுக்குத் தயார்செய்யப்படும்.
மதிப்பீடும் இறுதித் தேர்வும்: ஜனவரி – ஏப்ரல் 2027 – எழுத்துமுறைக் குழுக்களும் அவற்றின் துறைசார் நடுவர் குழுக்களும் ஜனவரியில் படைப்புகளைத் தனித்தனியாக மதிப்பிடும். தொடர்ந்து பிப்ரவரியில் நெறிப்படுத்தப்பட்ட கலந்தாய்வுகளும் மார்ச்சில் முடிவுகளும் இடம்பெறும்; 50 Best of the Best Jury ஏப்ரலில் தனது தேர்வை மேற்கொள்ளும்.
வெற்றியாளர்கள் அறிவிப்பு: 2027 முதல் அரையாண்டின் இறுதிப் பகுதியில் – GRANSHAN Conference & Ceremony மேடையில் வெற்றியாளர்கள் அறிவிக்கப்படுவார்கள் (இடமும் தேதியும் பின்னர் அறிவிக்கப்படும்).
நாங்கள் காக்கும் வாக்குறுதி: 17 மார்ச் 2026 அன்று முடிவடைந்த முந்தைய முன்பதிவுக் கட்டணக் காலத்தில் அனுப்பப்பட்டு, பின்னர் விருதுபெறும் படைப்புகளுக்குச் சிறப்புப் பாராட்டு வழங்கப்படும். போட்டிக்குப் பிந்தைய GRANSHAN தகவல் தொடர்புகளில் இந்த முன்பதிவுக் கால வெற்றியாளர்களின் படைப்புகள் முதலில் இடம்பெறும். இதனால் முடிவுகள் உலகுக்கு அறிவிக்கப்படும்போது அவர்களின் படைப்புகள் கவனம் பெறுவதில் முன்னிலை வகிக்கும்.
GRANSHAN Supporting Foundries Club
நடுத்தர அளவிலான எழுத்துரு நிறுவனங்களின் குழு, GRANSHAN Bloom Award ஐ உருவாக்கி அறிமுகப்படுத்த உதவுவதற்காக இணைந்துள்ளது – நிதி அளவிலும் செயல்திட்ட அளவிலும் பங்களிக்கிறது. போட்டியின் ஒட்டுமொத்தக் கருத்தாக்கத்திற்கு ஆதரவளித்த இந்த நிறுவனங்கள், இப்போது தங்கள் சொந்த ஊடகங்கள் மூலம் அதன் வீச்சைப் பெருக்குவதில் செயற்பாட்டுடன் பங்கேற்கின்றன.
ஒவ்வொரு ஆதரவு எழுத்துரு நிறுவனமும் சிறப்பு அங்கீகாரத்தையும் வழங்கும்: தங்கள் எழுத்துருக்கள் இடம்பெறும் வெற்றிப் படைப்புகளில் ஒன்றைத் தேர்ந்தெடுத்து, தங்கள் தளங்களில் சிறப்புக் காட்சிகள் மூலமும், GRANSHAN வழியாகவும், சமூக ஊடகங்களிலும் முன்னிலைப்படுத்தும்.
அவற்றின் பங்கு முழுக்க ஆதரவளிப்பதே – நடுவர் மதிப்பீட்டு நடைமுறையில் அவை பங்கேற்பதில்லை. மாறாக, போட்டியின் அடித்தளத்தை வலுப்படுத்துவதும், அதன் தகவல் தொடர்புக்கு உதவுவதும், அதன் வெற்றியாளர்களை உலகெங்கும் கொண்டாடுவதுமே அவற்றின் பங்கு. இந்தச் சிறப்புத் தொடர்பு, தனியான ஆதரவு எழுத்துரு நிறுவனத்தின் தேர்வுக் காட்சியில் வெளிப்படும் – நிறுவனத்தின் எழுத்துருக்களைச் சிறப்பாகப் பயன்படுத்தும் படைப்புகளை முன்னிலைப்படுத்தும் தனித்துவமான பரிசு இது.
படைப்புகளை அனுப்பும் தளம் மற்றும் ஊடகப் பிரிவுகளுக்கான வடிவங்கள்
GRANSHAN Bloom Award க்கான அனைத்துப் படைப்புகளும் எங்கள் பிரத்யேக படைப்புகளை அனுப்பும் தளம் வழியாக அனுப்பப்படுகின்றன. போட்டித் தளங்களில் நிபுணத்துவம் பெற்ற ஒருவருடன் இணைந்து இது உருவாக்கப்பட்டது. தேவையான மின்னூடக வடிவங்களில் உங்கள் படைப்பைப் பதிவேற்ற இந்த அமைப்பு உதவுகிறது; செயல்முறையின் ஒவ்வொரு படியிலும் வழிகாட்டுகிறது. நீங்கள் பணியாற்றும்போதே உங்கள் படைப்புப் பதிவு சேமிக்கப்படும். எனவே கட்டணம் செலுத்தும் வரை எத்தனை முறை வேண்டுமானாலும் திருத்தவும் புதுப்பிக்கவும் முடியும் – முன்கூட்டியே தொடங்கி, தொடர்ந்து செம்மைப்படுத்துங்கள். பங்கேற்புக் கட்டணத்தைச் செலுத்தியதும் படைப்பு அனுப்பப்பட்டதாகிறது; அதன் பிறகு பதிவு பூட்டப்பட்டுவிடும், அதைத் திருத்தவோ ரத்துசெய்யவோ முடியாது. 27 அக்டோபர் 2026 க்கு முன் அனுப்பப்பட்ட படைப்புகளை 22 டிசம்பர் 2026 வரை கட்டணமின்றித் திருத்தலாம் அல்லது நிறைவுசெய்யலாம்.
பொருள் வடிவிலான அல்லது அச்சுப் படைப்புகளுக்குத் தரமான மின்னணு ஆவணப்படுத்தல் அவசியம். படைப்பைத் தெளிவாகக் காட்டும் புகைப்படங்கள், மின்வருடப்பட்ட படங்கள் அல்லது காணொளிப் பதிவுகளை வழங்குங்கள். எடுத்துக்காட்டாக, ஒரு இதழைப் பக்கங்களைப் புரட்டிப் பார்க்கக்கூடிய PDF ஆகவும், பக்கங்களைப் புரட்டும் குறும் காணொளியாகவும் பதிவேற்றலாம். எழுத்தமைப்பின் நுண்விவரங்களைக் காட்ட, உயர் தெளிவுத்திறன் கொண்ட தனித்தனிப் பக்கப் படங்களையும் சேர்க்கலாம்.
படைப்புகளை அனுப்பும் தளம் உங்கள் படைப்புக் கோப்புகளை மட்டுமின்றி, நடுவர் மதிப்பீட்டுக்குத் தேவையான தகவல்களையும் சேகரிக்கும் வகையில் வடிவமைக்கப்பட்டுள்ளது. விருதுபெறும் பட்சத்தில் எங்கள் இணையக் கண்காட்சி, அச்சுப் பட்டியலேடு, நேரடிக் காட்சிகள் ஆகியவற்றில் உடனடியாகப் பயன்படுத்துவதற்கான தகவல்களும் இதில் அடங்கும். பின்வருவனவற்றை வழங்குமாறு உங்களிடம் கேட்கப்படும்:
பங்கேற்பாளர் மற்றும் தொடர்பு விவரங்கள்
படங்கள் (jpg, png), PDF கோப்புகள், காணொளிகள்
சுருக்கமான படைப்பு விளக்கம்
பங்களித்த அனைவருக்குமான பெயர்க் குறிப்புகள்; ஒவ்வொருவரின் உருவப்படமும் சுருக்கமான வாழ்க்கைக் குறிப்பும்
உங்கள் படைப்புக்கு விருது கிடைத்தால், மேலும் திருத்தங்கள் இன்றி மின்னணுத் திரையிடல், பெரிய அளவிலான அச்சு அல்லது இணையக் காட்சிப்படுத்தலுக்குப் பயன்படுத்தக்கூடிய வகையில் அனைத்துப் பொருட்களையும் தயாரிக்க வேண்டும். மதிப்பீட்டின் முதல் கட்டத்தில் உங்கள் படைப்பைப் பார்வையிட்டு மதிப்பிட நடுவர் குழுவும் இதே தளத்தைப் பயன்படுத்தும். கவனிக்கவும்: பங்கேற்புக் கட்டணம் செலுத்தப்பட்ட பின்னரே ஒரு படைப்பு நடுவர் குழுவுக்கு அனுப்பப்படும்.
நியாயமான மதிப்பீட்டை உறுதிசெய்ய, அனைத்துப் படைப்புகளும் அடையாளம் மறைக்கப்பட்டே நடுவர் குழுவுக்கு வழங்கப்படுகின்றன. படைப்புப் படிவத்தில் வழங்கிய விளக்க உரைகள் படைப்புடன் இடம்பெறும். ஆனால் பங்கேற்பாளரின் அடையாளத்தை வெளிப்படுத்தும் தகவல்கள் அவற்றில் இருக்கக் கூடாது. இயன்றபோதெல்லாம் அசைவூட்டப்பட்ட அல்லது அசைவு சார்ந்த பொருட்களை (காணொளி, GIF அல்லது அதற்கு இணையானவை) சேர்க்க வேண்டும். இதனால் நடுவர் குழு படைப்பை அதன் அசல் அசைவுள்ள வடிவில் அனுபவிக்க முடியும்.
1. பதிப்பாசிரிய வடிவமைப்பு மற்றும் வெளியீடு
காலகட்டம் 1 – மின்னூடக வடிவில் அனுப்புதல்
அட்டை, தேர்ந்தெடுக்கப்பட்ட இரட்டைப் பக்க விரிப்புகள், முக்கிய எழுத்தமைப்பு நுண்விவரங்கள் உட்பட வெளியீட்டை முழுமையாகக் காட்டும் உயர் தெளிவுத்திறன் கொண்ட PDF (300 dpi, அதிகபட்சம் 20 MB).
பின்வருவனவற்றைக் காட்டும் உயர்தரப் புகைப்படத் தொகுப்பு (JPEG, 300 dpi):
வெளியீட்டை ஒரு நேரடிப் பொருளாகக் காட்டுதல் (முன்பக்கம், பின்பக்கம், முதுகுப்பகுதி, அளவை ஒப்பிடுவதற்கான குறிப்பு)
ஒட்டுமொத்த அமைப்பைக் காட்டும் தனிப் பக்கங்களும் இரட்டைப் பக்க விரிப்புகளும்
முக்கிய எழுத்தமைப்புக் கூறுகளின் அண்மைக் காட்சிப் படங்கள்
விருப்பத்திற்குரியது: வெளியீட்டின் பக்கங்களைப் புரட்டிக் காட்டும் குறுங்காணொளி (≤2 நிமிடம், MP4).
காலகட்டம் 2 – தேர்வுப் பட்டியலில் இடம்பெற்ற பிறகு – நேரடிப் பிரதியை அனுப்புதல்
ஒவ்வொரு படைப்பின் அச்சிடத் தயாரான ஒரு பிரதியைக் குறிப்பிடப்படும் பிராந்திய முகவரிக்கு அனுப்புங்கள் (தேர்வுப் பட்டியல் வெளியான பிறகு விவரங்கள் வழங்கப்படும்). இவை நேரில் மதிப்பிடுவதற்குப் பயன்படுத்தப்படும்; பின்னர் நேரடிக் கண்காட்சியின் ஒரு பகுதியாக இடம்பெறும்.
2. சுவரொட்டிகள் (அச்சு மற்றும் மின்னூடகம்)
மின்னூடக வடிவில் அனுப்புதல்
சுவரொட்டிக் கோப்பு: JPEG/PNG (300 dpi, இறுதி அச்சு அளவில்; எ.கா., A1/A0 அல்லது விளம்பரப் பலகை விகிதம்)
வெளிப்புற வடிவங்களுக்கு: அளவையும் தாக்கத்தையும் விளக்க, சுவரொட்டி பயன்படுத்தப்பட வேண்டிய சூழலில் இருப்பதைக் காட்டும் கூடுதல் படம் (எ.கா., தெருவிலுள்ள 18/1 விளம்பரப் பலகை).
மின்னூடகச் சுவரொட்டிகளுக்கு: MP4 கோப்பு (1080p, ≤3 நிமிடம்) அல்லது செயல்பாட்டிலுள்ள காட்சிக்கான இணைப்பு.
விருப்பத்திற்குரியது: அச்சிடத் தயாரான பதிப்புகளுக்கு வெட்டுக் குறிகளுடன் கூடிய PDF.
3. பொதிவாக்க வடிவமைப்பு
காலகட்டம் 1 – மின்னூடக வடிவில் அனுப்புதல்
பொதிவாக்கத்தை முப்பரிமாண (3D) பொருளாகத் தொடர்புடைய அனைத்து கோணங்களிலிருந்தும் காட்டும் புகைப்படத் தொகுப்பு (JPEG, 300 dpi).
எழுத்தமைப்பு ஏற்பாட்டை அதன் சூழலில் காட்ட, உயர் தெளிவுத்திறன் கொண்ட PDF ஆகத் தட்டையான விரிப்பு வடிவம் (மடிக்கப்படாத வெட்டு வரைபடம்).
விருப்பத்திற்குரியது: பொதியுடனான ஊடாட்டத்தை விளக்கும் குறுங்காணொளி (≤2 நிமிடம்), எ.கா., பொதியைத் திறத்தல்.
காலகட்டம் 2 – தேர்வுப் பட்டியலில் இடம்பெற்ற பிறகு – நேரடிப் பிரதியை அனுப்புதல்
ஒவ்வொரு படைப்பின் அச்சிடத் தயாரான ஒரு பிரதியைக் குறிப்பிடப்படும் பிராந்திய முகவரிக்கு அனுப்புங்கள் (தேர்வுப் பட்டியல் வெளியான பிறகு விவரங்கள் வழங்கப்படும்). இவை நேரில் மதிப்பிடுவதற்குப் பயன்படுத்தப்படும்; பின்னர் நேரடிக் கண்காட்சியின் ஒரு பகுதியாக இடம்பெறும்.
4. மின்னூடகம் மற்றும் இடைமுக வடிவமைப்பு
ஊடாட்டத்தையும் வழிசெலுத்தலையும் காட்டும் விளக்கக் காணொளி (MP4, ≤3 நிமிடம்).
முக்கிய திரைகளின் திரைப்பிடிப்புகள் (JPEG, 1920×1080 px).
செயல்பாட்டிலுள்ள இணையதளம்/செயலிக்கான URL (மதிப்பீடு முடியும் வரை அணுகக்கூடியதாக இருக்க வேண்டும்).
5. அசையும் வரைகலை மற்றும் அசைவூட்டம்
MP4/MOV வடிவில் காணொளி (1920 × 1080 px, ≤3 நிமிடம், ≤3 GB)
விருப்பத்திற்குரிய காட்சித்தொடர் வரைவு PDF (அதிகபட்சம் 4 பக்கங்கள்)
6. இடச்சூழல் மற்றும் அனுபவ வடிவமைப்பு
புகைப்படத் தொடர் (JPEG, 300 dpi): சூழல் காட்சிகள் + நுண்விவரக் காட்சிகள்
விருப்பத்திற்குரிய விளக்கக் காணொளி (MP4, ≤2 நிமிடம்)
தள வரைபடங்கள் / அமைப்பு வரைபடங்கள் (PDF, இயன்றவரை திசையன் வடிவில்)
7. பரப்புரைகள்
ஒவ்வொரு முக்கிய செயலாக்கத்திற்குமான படங்கள் (JPEG) (அச்சு, சுவரொட்டி, மின்னூடக விளம்பரங்கள்)
பரப்புரை எவ்வாறு செயல்படுத்தப்பட்டது என்பதைக் காட்டும் விருப்பத்திற்குரிய காணொளி (MP4, ≤3 நிமிடம்)
செயல்பாட்டிலுள்ள பரப்புரைத் தளங்களுக்கான இணைப்பு
8. காட்சி அடையாளம் மற்றும் வணிக அடையாள உருவாக்கம்
இலச்சினைத் தொகுப்பின் PDF கோப்புகள் (திசையன் வடிவில்), அத்துடன் பயன்பாட்டு எடுத்துக்காட்டுகள் (JPEG கோப்புகள்)
வணிக அடையாளம் பயன்படுத்தப்படும் காட்சிகள் (எ.கா., அலுவலகக் காகிதப் பொருட்கள், பொதிவாக்கம்)
விருப்பத்திற்குரிய வழிகாட்டுதல் PDF (அதிகபட்சம் 5 பக்கங்கள்)
9. சோதனை முயற்சிகள், வெளியிடப்படாத மற்றும் எழுத்தோவியப் படைப்புகள்
PDF வடிவில் படைப்புத் தொகுப்பு அல்லது ஆவணப்படுத்தல் (அதிகபட்சம் 10 பக்கங்கள்)
விருப்பத்திற்குரிய மின்னூடக முன்வடிவம்: விளக்கக் காணொளி அல்லது URL
தொடர்புடைய கருத்தாக்கப் பொருட்கள் (வரைவுகள், ஆய்வுக் குறிப்புகள்)
பங்கேற்பு விதிகள் மற்றும் பொதுவான விழுமியங்கள்
GRANSHAN Bloom Award ஒரு போட்டியைவிட மேலானது – சிறப்பு, மரியாதை, பண்பாட்டு உரையாடல் ஆகியவற்றுக்கான பகிர்ந்த வெளி. இந்த வெளி அனைவருக்கும் திறந்ததாகவும், நியாயமானதாகவும், ஊக்கமளிப்பதாகவும் இருப்பதற்காக எங்கள் விதிகள் வடிவமைக்கப்பட்டுள்ளன.
பங்கேற்பு மூன்று எளிய உறுதிப்பாடுகளை அடிப்படையாகக் கொண்டது:
நமது பொதுக் கொள்கைகள்
பங்கேற்பதன் மூலம் GRANSHAN தன்னுறுதி அறிக்கையை நீங்கள் ஏற்றுக்கொள்கிறீர்கள். புரிதலுக்கும் அடையாளத்திற்கும் வலுசேர்க்கும் ஆற்றலாக வடிவமைப்பு திகழ்கிறது என்ற எங்கள் நம்பிக்கையையும், ஆக்கிரமிப்பு, பாகுபாடு அல்லது துன்புறுத்தலுக்கு மேடை அளிக்க மறுப்பதையும் அது பிரதிபலிக்கிறது.தகுதி
அனுப்பப்படும் படைப்புகள் சொந்தப் படைப்புகளாக இருக்க வேண்டும் அல்லது படைப்பாளரின்/படைப்பாளர்களின் முழு அனுமதியுடன் அனுப்பப்பட வேண்டும். ஒவ்வொரு படைப்பும் இலத்தீனுக்கு அப்பாற்பட்ட குறைந்தது ஓர் எழுத்துமுறையைக் கொண்டிருக்க வேண்டும்; அது உரையின் கணிசமான பகுதியைத் தாங்க வேண்டும் (ஒரே ஒரு சொல்லோ அலங்காரத்துக்கான ஒரு தொடுகையோ போதாது); போட்டியின் ஊடகப் பிரிவுகளுக்குள் வர வேண்டும். மாணவர் மற்றும் தொழிற்பயிற்சிப் படைப்புகள் எனத் தெளிவாகக் குறிக்கப்பட்டவை உட்பட, வெளியிடப்பட்ட, வெளியீட்டுக்கு முந்தைய, வெளியிடப்படாத படைப்புகள் வரவேற்கப்படுகின்றன.பதிப்புரிமை மற்றும் பயன்பாட்டு உரிமைகள்
படைப்பை அனுப்புவதன் மூலம், அதற்குத் தேவையான உரிமைகள் உங்களிடம் இருப்பதை உறுதிசெய்கிறீர்கள். கண்காட்சிகள், வெளியீடுகள், விருது தொடர்பான ஊடகங்களில் உங்கள் படைப்பை எப்போதும் உரிய பெயர்க் குறிப்புடன் காட்சிப்படுத்த GRANSHAN மற்றும் அதன் கூட்டாளர்களுக்குப் பிரத்தியேகமற்ற உரிமத்தை வழங்குகிறீர்கள். உங்கள் படைப்பில் மூன்றாம் தரப்புப் பொருட்கள் இருந்தால், அவற்றைப் பயன்படுத்துவதற்கான உரிமைகளைப் பெறுவது உங்கள் பொறுப்பு. ரகசியமான அல்லது வெளியீட்டுத் தடைக்கு உட்பட்ட படைப்புகள் கவனத்துடனும் ரகசியம் காக்கும் வகையிலும் கையாளப்படும்.
இந்த உறுதிப்பாடுகள் GRANSHAN Bloom Award நியாயத்திலும் நேர்மையிலும் வேரூன்றி இருப்பதை உறுதிசெய்கின்றன. இதனால் எழுத்துமுறைகள் மற்றும் வடிவமைப்பின் கொண்டாட்டம், அது சேவையாற்றும் சமூகங்களைப் போலவே திறந்ததாகவும், அனைவரையும் உள்ளடக்கியதாகவும், உயிரோட்டமிக்கதாகவும் நீடிக்க முடியும்.
GRANSHAN தன்னுறுதி அறிக்கை
உலகளாவிய காட்சி அடையாளத்தின் மையமாக, GRANSHAN எழுத்துருக் கோப்புகள் மற்றும் எழுத்தமைப்பு, வடிவமைப்பு, தகவல் தொடர்பு ஆகியவற்றைக் கொண்டாடுகிறது. இதன் மூலம் உள்ளூர், பிராந்திய, உலகளாவிய நிலைகளுக்கு இடையிலான சமநிலையுடன் சமூகங்கள், பண்பாடு, வணிகங்கள் வளர GRANSHAN ஆதரவளிக்கிறது. GRANSHAN சர்வதேசப் புரிதலுக்கான ஒரு திட்டம்: உயர்தர எழுத்துருக் கோப்புகளையும் சிறந்த எழுத்தமைப்பையும் கொண்டு மேற்கொள்ளப்படும் தகவல் தொடர்பு, உரையாடலுக்கு வழிசெய்து அடையாளத்திற்கு வலுசேர்க்கிறது. எங்கள் அணுகுமுறை ஒருபோதும் விலக்கிவைப்பதல்ல; அது பரந்ததும் அனைவரையும் உள்ளடக்கியதும் ஆகும்.
அதே நேரத்தில், உலகெங்கும் நிலவும் பல்வேறு மோதல் சூழல்களையும் அனைத்து வகையான அநீதிகளையும் நாங்கள் அறிந்துள்ளோம்; உலகளவில் செயல்படும் திட்டமாக அவற்றைத் தொடர்ந்து எதிர்கொள்கிறோம். வெளியில் இருந்து சூழல்களை மதிப்பிடுவதில் உள்ள சவாலையும் தவறிழைக்கும் வாய்ப்புகளையும் உணர்ந்துள்ளோம். GRANSHAN Foundation இன் நிறுவனர்கள் மற்றும் ஆதரவாளர்களில் பலர் இந்த விவகாரங்களில் வலுவான கருத்துகளைக் கொண்டுள்ளனர். அவற்றை நாங்கள் மதிக்கிறோம். இந்த மரியாதையும் திறந்த மனப்பான்மையும் பரஸ்பரமாக இருக்கும் வரை, இந்தக் கருத்துப் பன்மைத்துவத்தை அணுகவும், பரஸ்பரப் புரிதலுக்கான சவாலை ஏற்கவும் மகிழ்ச்சியுடன் தயாராக இருக்கிறோம்.
எங்கள் அனைத்துச் செயல்பாடுகளிலும் மீற முடியாத வரம்புகள் தெளிவானவை: எந்த வடிவிலான ஆக்கிரமிப்புப் போரையோ, பயங்கரவாதத்தையோ, எந்த வகையான பாகுபாட்டையும் துன்புறுத்தலையும் ஆதரித்துப் பேசும் எவருக்கும் நாங்கள் மேடை வழங்க முடியாது. சர்வதேசச் சட்டம், பரஸ்பரப் புரிதல், ஒத்துழைப்பு ஆகியவற்றின் அடிப்படையிலான உலக ஒழுங்கிற்காக நாங்கள் நிற்கிறோம்.
தகுதி மற்றும் பதிப்புரிமைப் பிரகடனம்
1. தகுதி அளவுகோல்கள்
1.1 அனுப்பப்படும் படைப்புகள் பங்கேற்பாளரின் சொந்தப் படைப்புகளாக இருக்க வேண்டும் அல்லது மூலப் படைப்பாளரின்/படைப்பாளர்களின் வெளிப்படையான அனுமதியுடன் அனுப்பப்பட வேண்டும்.
1.2 தகுதிபெறும் படைப்புகள் இலத்தீனுக்கு அப்பாற்பட்ட குறைந்தது ஓர் எழுத்துமுறையைக் கொண்டிருக்க வேண்டும்; போட்டியின் குறிப்பிட்ட ஊடகப் பிரிவுகளுக்குள் வர வேண்டும்.
1.3 பின்வரும் வடிவங்களில் படைப்புகள் ஏற்கப்படுகின்றன:
வெளியிடப்பட்ட படைப்புகள் (வணிகரீதியாக வெளியிடப்பட்டவை அல்லது ஒப்பந்தத்தின் பேரில் உருவாக்கப்பட்டவை)
வெளியீட்டுக்கு முந்தைய படைப்புகள் (இன்னும் வெளியிடப்படாதவை, ஆனால் வெளியிடும் நோக்கத்துடன் உருவாக்கப்பட்டவை)
வெளியிடப்படாத படைப்புகள் (கருத்தாக்கம் சார்ந்தவை, ஆய்வு சார்ந்தவை அல்லது சாத்தியங்களைச் சிந்திப்பவை)
1.4 மாணவர் மற்றும் தொழிற்பயிற்சிப் படைப்புகள் தகுதியானவை; அனுப்பும்போது அவை அவ்வாறானவை எனத் தெளிவாகக் குறிக்கப்பட வேண்டும்.
2. பதிப்புரிமையும் பயன்பாட்டு உரிமைகளும்
2.1 அனுப்பப்படும் படைப்புகளின் அனைத்துப் பதிப்புரிமைகளும் பங்கேற்பாளரிடமே இருக்கும். பங்கேற்பதன் மூலம், GRANSHAN Bloom Award தொடர்பான நோக்கங்களுக்காக மட்டுமே, கீழே விவரிக்கப்பட்டுள்ள குறிப்பிட்ட, வரையறுக்கப்பட்ட பயன்பாட்டு உரிமைகளை மட்டும் GRANSHAN மற்றும் அதன் கூட்டாளர்களுக்குப் பங்கேற்பாளர்கள் வழங்குகின்றனர்.
2.2 படைப்பை அனுப்புவதன் மூலம், அனுப்பப்படும் படைப்பின் சட்டப்பூர்வப் பதிப்புரிமையாளர் தாமே என்பதையோ, அல்லது உரிய பதிப்புரிமையாளரிடமிருந்து/பதிப்புரிமையாளர்களிடமிருந்து முழுமையான எழுத்துப்பூர்வ அனுமதியைப் பெற்றுள்ளதையோ பங்கேற்பாளர் உறுதிசெய்கிறார்.
2.3 பின்வருவனவற்றைச் செய்ய GRANSHAN மற்றும் அதன் அதிகாரப்பூர்வக் கூட்டாளர்களுக்குப் பிரத்தியேகமற்ற, உலகளாவிய, உரிமக் கட்டணமற்ற உரிமத்தைப் பங்கேற்பாளர் வழங்குகிறார்:
கண்காட்சிகள், அச்சு மற்றும் மின்னூடக வெளியீடுகள், ஆவணப்படுத்தல், விருது தொடர்பான விளம்பரப் பொருட்கள் உட்பட GRANSHAN Bloom Award தொடர்பான வணிக நோக்கமற்ற பயன்பாடுகளுக்காகப் படைப்பைப் பிரதியெடுத்தல், காட்சிப்படுத்துதல், விநியோகித்தல்.
உரிய பெயர்க் குறிப்புடன், எதிர்கால GRANSHAN வெளியீடுகள், ஆய்வுகள் அல்லது பின்னோக்குப் பார்வைகளில் படைப்பைக் காப்பகப்படுத்திக் காட்சிப்படுத்துதல்.
3. மூன்றாம் தரப்புப் பொருட்களின் பயன்பாடு
3.1 அனுப்பப்படும் படைப்பில் மூன்றாம் தரப்பினரின் எழுத்துருக் கோப்புகள், படங்கள் அல்லது அறிவுசார் சொத்து போன்ற கூறுகள் இடம்பெற்றிருந்தால், தேவையான அனைத்துப் பயன்பாட்டு உரிமைகளையும் பெறுவதற்குப் பங்கேற்பாளர் மட்டுமே பொறுப்பாவார்.
3.2 அனுமதியற்ற மூன்றாம் தரப்புப் பொருட்களைக் கொண்ட படைப்புகளை அனுப்புவதால் ஏற்படும் பதிப்புரிமை மீறல் அல்லது அது தொடர்பான சட்டக் கோரிக்கைகள் எவற்றுக்கும் GRANSHAN Bloom Award அமைப்பாளர்கள் பொறுப்பேற்க மாட்டார்கள்.
4. ரகசியமான அல்லது வெளியீட்டுக்கு முந்தைய படைப்புகள்
4.1 அனுப்பப்படும் படைப்பில் ரகசியமான அல்லது வெளியிடப்படாத பொருட்கள் இருந்தால், பங்கேற்பாளர்கள் அதைக் குறிப்பிடலாம். இத்தகைய படைப்புகள் கவனத்துடனும் ரகசியம் காக்கும் வகையிலும் கையாளப்படும்; எழுத்துப்பூர்வ வெளியீட்டு அனுமதி கிடைக்கும் வரை அல்லது ஒப்புக்கொள்ளப்பட்ட வெளியீட்டுத் தேதி வரை பொதுக் காட்சியில் இடம்பெறாது.
4.2 பங்கேற்பாளர்கள் வெளியீட்டுத் தடைகளையும் நிபந்தனைக்குட்பட்ட காட்சிப்படுத்தல் வரம்புகளையும் கோரலாம்; நடைமுறையில் இயன்றவரை அவை மதிக்கப்படும்.
5. ஒப்புதல் பிரகடனம்
படைப்பை அனுப்பும்போது பங்கேற்பாளர்கள் அனைவரும் பின்வரும் பிரகடனத்தை ஏற்க வேண்டும்: “அனுப்பப்படும் படைப்பு சொந்தப் படைப்பு என்பதையும், அதன் பதிப்புரிமையாளர் நானே அல்லது இந்தப் படைப்பை அனுப்புவதற்குத் தேவையான அனைத்து உரிமைகளையும் பெற்றுள்ளேன் என்பதையும், GRANSHAN Bloom Award இன் தகுதி மற்றும் பதிப்புரிமை நிபந்தனைகளை ஏற்றுப் பின்பற்றுகிறேன் என்பதையும் இதன்மூலம் உறுதிசெய்கிறேன்.”
நேசத்திற்குரிய எழுத்துமுறைகள், நேசத்திற்குரிய உலகங்கள்
தனிநபர் வல்லமையிலிருந்து கூட்டு அங்கீகாரம் நோக்கிச் செல்லும் இந்தப் பயணம், விருதுகளில் மட்டுமின்றி பண்பாடுகளைக் கடந்து பகிரப்படும் கவனம், உரையாடல், ஒத்திசைவு ஆகியவற்றிலும் நிறைவடைகிறது.
இது மின்னுலகையும் நிலையற்ற தருணங்களையும் கடந்து வாழும் கொண்டாட்டம் – தொட்டுணரக்கூடிய வடிவத்திலும், பொது வெளியிலும், மக்களுக்கும் அவர்களது எழுத்துமுறைகளுக்கும் இடையிலான ஆழமான பண்பாட்டுப் பிணைப்புகளிலும் வேரூன்றியது.
உலகின் பல பகுதிகளில் – ஆர்மீனியா முதல் கொரியா வரை, தாய்லாந்து முதல் இந்தியத் துணைக்கண்டம் வரை – எழுத்துமுறைகள் வெறும் தகவல் தொடர்புக் கருவிகள் அல்ல; அடையாளம், சார்ந்திருக்கும் உணர்வு, தொடர்ச்சி ஆகியவற்றின் வலுவான குறியீடுகள்.
இந்தத் தொடர்பை GRANSHAN பயணம் கௌரவிக்கிறது: எழுதுவதற்கான உரிமை, கண்ணில் படுவதற்கான உரிமை, வாசிக்கப்படுவதற்கான உரிமை.
ஒரே அச்சுக்குள் அடங்காமல், எழுத்துமுறைகளையும் பிராந்தியங்களையும் கடந்து விரியும் இந்த உணர்வுடன்தான் உலக வடிவமைப்பின் வளத்தை நாம் கொண்டாடுகிறோம்.
GRANSHAN Bloom Award குழு